Será en Ordes, este venres vindeiro, a iso das 20:00h, no IES nº 1, cando se inaugure, da man da Associaçom Foucelhas desa localidade, a mostra biográfica sobre Xohán Xesús González, elaborada polo Fervedoiro e que xa leva varios meses discorrendo por varios lugares do país. Arroupados polo devandito colectivo, O Fervedoiro participará nunha palestra que versará sobre a figura do canteiro e político cuntiense fusilado polos fascistas en setembro de 1936.

Desta volta, e como xa aconteceu en Cuntis, Compostela e Teo, Xohán Xesús reencontrarase con aqueles lugares polos que deambulou coa súa palabra viva e activa, chea de compromiso patrio e de loita polos dereitos dos/as traballadores/ras galegos/as. A súa maceta e o seu cicel resoarán por aquelas xeografías e falarase de memoria, de consciencia de nación, de represaliados daquelas e doutras terras, e de barbarie para atoparmos na palabra a paz que lle foi furtada a moitas familias, e por extensión a todo o noso país.

Dende Foucelhas xa levan tempo a realizar un encomiábel labor de recuperación da Memoria Histórica, incluso están a elaborar un censo de represaliados das terras de Ordes, para así recuperaren e recuperarmos liberdade e democracia. Velaí tamén outro testemuño de liberdade no propio nome deste colectivo, Benigno Andrade García “Foucellas” (Ordes, 22 de outubro de 1908 – por Garrote Vil na Coruña 26 de xuño de 1952).Dende O Fervedoiro e da man dos amigos de Ordes recordaremos a Asunción Concheiro Iglesias, O Foucellas, a Xohán Xesús (Cequeril 1895, Tapias de Boisaca 1936), Francisco Comesaña Rendo, Manuel Sousa Hermida… Porque recordalos, e telos con nós, aos que loitaron pola democracia, dende a República ou a clandestinidade, é facermos memoria, e entregarlles vida, e recuperarlle parte da súa dignidade lixada polos innomeábeis golpistas, terroristas da democracia e da cultura, das identidades e diversidades, da liberdade de expresión e dos dereitos fundamentais do ser humano, así como por extensión dos pobos (nacións).

A xornada do 26 de decembro foi unha mostra máis da forte resposta popular aos continuos ataques que sofre o noso pobo. Sen apoio institucional e propagandístico co que si contan os actos do réxime (véxase por exemplo o acto deportivo-publicitario que hai uns días trouxo a un nadador español a percorrer un tramo das augas do Ulla e de paso seguir engrosando a conta corrente da axencia publicitaria que opera para a Xunta dende a Meseta)  centos de siareir@s participaron nas actividades que SS.GG. organizou o 26-D en Compostela.

 As rúas, as bancadas e os concertos víronse asolagados, unha outra vez, por unha maré de diginidade que non está disposta a ceder a pesar das múltiples presións as que estamos sendo expostos. Como mostra a insultante presenza policial ao longo do percorrido da manifestación nacional e os apupos que lles ofrecen a prensa amiga e servil.

A xornada deu comezou xa na tarde, cunha concorrida manifestación que baixo o lema “Selecçom nacional: Direito popular!” percorreu as rúas de Compostela. Proclamas como "Somos nación, queremos selección", "Galegos somos, galegos seremos, por españois nunca pasaremos" acompañaron o ambiente festeiro e reivindicativo de partida até as inmediacións do Estadio de Santa Isabel.

Unha vez dentro, a xogadora do Español e capitá da selección feminina nos anteriores encontros da Irmandiña, Verónica Boquete, leu un manifesto na defensa do combinado nacional e en reivindicación do deporte feminino. "Temos que visibilizar o papel de Galiza e o papel das mulleres no deporte", dixo entre os interminábeis aplausos dos afeccionados.

A seguir, Antón Reixa foi o encargado de ler un segundo manifesto, o que acabou por afoutar ás bancadas. Apelando á forza do pobo galego, pediu "vontade firme" para superar uns tempos que se anticipan como a "travesía polo deserto que resultou ser o fraguismo". "Estamos seguros de que o traballo de siareiros, deportistas, artistas e cidadanía toda servirán para demostrar a forza do noso pobo" e "enfrontarnos ao centralismo español máis rancio", berrou. "Somos nación e temos dereito a selección", concluíu.

A partir deste momento, iniciouse o partido. O ciclista David Blanco, varias veces campión da Volta a Portugal, foi o encargado de realizar o saque de honra, xunto cun representante da Liga Nacional de Billarda.

A Irmandiña aliñou a un equipo mixto, que estivo composto por Adrian Padrón e Daniel Portela (Ourense); Rubén Márquez, Alberto Domínguez, Alberto Mariño, Anxo Liñares e Óscar Seoane “Jimy” (Compostela); Quico (Arousa); Manu Rodríguez (Vilalonga); Rubén Pisto e Valentín (Verín); Óscar Comís (Coruxo); Daniel Conde, Xurxo Colón, Nacho Fernández e Marcos Martínez Munín (Negreira);Carolina Baños Ameneiro, Mónica Naval Cortés, Mirian Domínguez Marcos (Arousá); Barca Toba Suarez (Orzán); Sheila e Andrea Carid (Pontevedra).

Os adestradores nacionais foron Fernando Vázquez e Pilar Neira, quen fora seleccionadora feminina nos últimos anos. O encontro ofreceu goles xa nos primeiros minutos de xogo e os futbolistas foron para o descanso cun 5 a 0 no marcador. Malia que o combinado estranxeiro contou con algunha ocasión na portería galega, en ningún momento houbo serio risco de que a pelota entrase nas mallas. Pola contra, o xogo disputouse sempre en campo contrario e os galegos gozaron de innumerábeis ocasións.

O escenario foi semellante na segunda parte, cando a Irmandiña foi quen de marcar outros catro goles máis para divertimento dunha bancada que xa estaba desbocada. Ao berro de "Galiza Nación, Galiza Selección" apoiaron o equipo até o remate do encontro. Ao final, os seareiros agradeceron a entrega de xogadores, adestradores e organización e os futbolistas marcharon coa satisfacción de xogar un bo encontro no que, con todo, o fútbol volveu ser o de menos.

Xa para a noite estaba reservado o tempo para música dos Mencer Vermelho, Machina e Habeas Corpus que foron os encargados de poñer o peche a unha outra xornada de afianzamento dos nosos valores como pobo, que a pesar dos continuos atrancos non son quen de parar porque que queiran que non, xa temos selección!!!

Finamente, e como ben informando Siareir@s Galeg@s na sua web durante estes días, quedou pechada a ambiciosa xornada do vindeiro sábado 26 de decembro en Compostela deseñada polo colectivo nacional.

Os actos quedan como segue:

•  Manifestación; as 17 horas dende o paseo da Alameda. Percorrerá as rúas de Compostela baixo a lenda “Selección nacional: dereito popular!” e rematará no campo de Santa Isabel para asisitir ao encontro da selección galega fronte a un combinado internacional.
• Encontro: as 19h. dará comezo o encontro da selección nacional (conformado por xogadores de diversas categorías) fronte a un combinado internacional. Depáranse importantes sorpresas no campo de Santa Isabel.
• Concerto: para por o peche a este día de reivindicación na sala Capitol terá lugar o concerto de Machina, Mencer Vermelho e Habeas Corpus. As entradas para este evento son a 8 euros anticipadas (12 euros en taquilla) e xa están a venta nos seguintes establecementos: Compostela: Gong e Gentalha; Vigo: Tipo e Revolta; Corunha: Portobello; Trasancos: Artabria; Pontevedra: Tipo; Ourense: Esmorga. *Nós tamén teremos estas entradas por anticipado, asique xa podedes ir reservando xunto co cartón de SS.GG.

 É mais importante ca nunca a información “boca a boca” para que a nosa resposta sexa do tamaño da importancia que require esta reivindación. Por iso vos pedimos que botedes unha man, para que esta información chegue alí onde non poidan facelo os nosos altofalantes.

 O vindeiro martes, 22 de decembro, ás 21h. na biblioteca municipal “Roberto Blanco Torres” de Cuntis terá lugar unha asamblea de carácter aberto na que, ademáis de entregar os cartóns e entradas anticipadas para o concerto a tod@s aqueles/-as que estades a reservar, aproveitaremos para facer partícipe deste movimento a aquelas persoas que queiran entrar a colaborar. Esto non quere decir que o noso colectivo abandoe esta loita pola reivindicación da oficialidade, á que nos ligamos en xullo do 2006, porén o que se pretende é dar paso a creación dunha asamblea comarcal de SS.GG. na que teña cabida toda aquela xente comprometida con esta causa e que queira botar unha man neste eido.

 Vendo a resposta que está obter esta nova xornada organizada por SS.GG., xa estamos ao redor das cincuenta persoas que se desprazarán dende estas terras, estase valorando a posibilidade de poñer un autobús para desprazármonos até a capital da Galiza. Na asamblea da vindeira semana valoraremos entre tod@s esta posibilidade ademáis doutros aspectos.  

 Poderedes seguir facendo as vosas reservas (cartóns de SS.GG. e entradas anticipadas po concerto) no enderezo do noso colectivo: ofervedoiro@hotmail.com ou ben no seguinte número de teléfono: 678.187.973.

Acude, difunde e participa!

 Que queiran, que non... a nosa forza seguirá acompañando á selección nacional!

Achégase o nadal, e nestes últimos anos estamos acostumados a que veña na compaña da cita ineludíbel coa loita pola oficialidade, emprendida dende fai máis dunha década por SS.GG., e que ten o seu punto álxido cada ano ao redor dos compromisos amigábeis da selección nacional.

Apareceu o actual goberno galego coa súa negativa, outra máis que se suma as políticas antigalegas que deu por infrinxir ao noso pobo, queréndonos pribar así do desfrute da nosa selección. Alegando motivos económicos entre “outros”.Resulta “curioso” que estes/as mesmos/as dirixentes son os que non puxeron reparos, máis ben todo o contrario, para traer á Coruña aló polo mes de setembro pasado a selección española de fútbol tendo que encher o estadio con seareiros achegados dende outras latitudes do estado. E todo esto contando, como non, coa inestimábel colaboración de todo o “aparato propagandístico”.

 “Se eles non o fan o pobo farao “ , e vai ser así como Siareir@s Galeg@s continuará coas suas arengas. Grazas a todas as persoas que están a traballar a día de hoxe dende o colectivo nacional o día grande pola OFICIALIDADE vai ter lugar un ano máis. Desta volta e ao igual que no reestreo da Irmandiña será Compostela a cidade que o acolla. A data, sábado 26 de decembro, é polo momento o que podemos adiantar con seguranza a espera de que nos vindeiros días se vaian confirmando os diferentes actos que con gran esforzo se están a preparar (manifestación, encontro, concertos…).

É preciso agora máis ca nunca reafirmar a resposta que foi medrando dende a nosa comarca, con números abraiantes, a pesar dos atrancos que adoitaron, e adoitan, aparecer no noso camiño (…o noso destino!).  

Por outra banda informámosvos de que xa temos a venda os cartóns oficiais de SS.GG. para este ano ao prezo de 5 euros e co agasallo, para os cincocentos primeiros, dunha camisola do colectivo nacional. Poderédelo conseguir poñéndovos en contacto con nós a través do noso correo:  ofervedoiro at hotmail.com ; ou ben falando con aquelas persoas que sabedes que levamos traballando na vosa comarca estes últimos anos.

Adiante Galiza!!!

Emotiva e intensa foi a presentación en Calo (Teo) da mostra Xohán Xesús González: porta dun futuro proletario, elaborada polo noso colectivo e levada (moi ben levada) até as devanditas terras pola Asociación A Oliveira (colectivo pola Recuperación da Memoria Histórica). Á parte da representación consabida do Fervedoiro, compartiron mesa Xosé Luís Santos (como membro da Oliveira) e a poeta Elvira Riveiro Tobío (residente dende hai uns meses na freguesía cuntiense de Cequeril, non moi lonxe da campa na que repousan os restos de Xohán Xesús).

Primeiramente interviu o propio Xosé Luís e tratou sobre a vinculación do canteiro de Cuntis coa xeografía de Teo, dende o labor do sindicalismo, o oficio de labrar a pedra, a dinamización política da USG e a configuración do Terzo de Calo canda o levantamento fascista e golpe de estado de 1936. A continuación toma a palabra O Fervedoiro, na persoa de Héitor Picallo, e dá unhas ciceladas na biografía de Xohán Xesús, tanto no eido político como dentro do labor cultural nos círculos compostelán, vigués, cuntiense... Achegouse nova información, inédita nalgún eido deste político fusilado en Boisaca en setembro do 36, e de seguido alzou o verso Elvira Riveiro, que declamou un poema inédito (titulado “Escarificación”) que formará parte do poemario que está a elaborar O Fervedoiro na honra de Xohán Xesús González, e no que haberá varias ducias de composicións líricas creadas por unha manchea de poetas galegos. Erguendo a súa voz, Elvira volveu reivindicar un Día das Letras Galegas para Xohán Xesús González, porque ben merecente é deste recoñecemento, porque loitou pola conservación da nosa cultura e idioma (hogano tan mancadas por algúns roedores do hórreo) e por ser coherente e defensor dos dereitos da muller, do traballador e do pobo galego.

Presente estivo Carme Hermida (membro do Instituto da Lingua Galega e Concelleira de Cultura de  Teo) e Francisco Fernández Rei (numerario da Real Academia Galega e así mesmo de esoutra institución). Varias persoas (as que gustaron) compartiron conversa ao final do acto, nun intercambio de opinións e reflexións, pero sobre todo observouse unha cidadanía consciente da situación que nos toca vivir e crítica con aqueles tempos de loito e sangue.

Emotiva, entre outras, foi a intervención de Eduardo Liste (sobriño de Enrique Lister e fillo de Constante, tenente alcalde de Teo canda a República, fusilado polos fascistas), e que nos informou sobre a morte de varios dos seus familiares e do momento no que, os da súa casa, foron recoller os restos mortais de Faustino Liste no cemiterio de Boisaca. Este último persoeiro, membro do Terzo de Calo, amigo de Xohán Xesús e fusilado canda el, asasinado polos fascistas (alias “falanxistas, franquistas, criminais, racistas...”) e testemuña das últimas vontades do canteiro de Cuntis, apareceu nun foxo do devandito camposanto. E alí mesmo comprobaron “os de Liste”, na mutilación dos dedos das mans do seu parente, as torturas que padeceron os republicanos (leais á Democracia) antes de recibiren o tiro de graza e o peso do chumbo.

Días como estes fannos reflexionar e non esquecer que a memoria deixará de ser un obxecto prohibido porque aínda fican sobre nós sombras que están presentes, e que só serán disipadas cando se reescriba a historia e se diga en pública voz o nome dos culpábeis, cando se revisen os xuízos sumarísimos e cando algúns (incluída a empresa e institución da igrexa católica, cómplice e ramera do réxime) pidan un sincero perdón.

Este sábado, 7 de novembro, mercé da Asociación A Oliveira de Teo (Colectivo pola Recuperación da Memoria Histórica) inaugurarase a partir das 12h. no Local Municipal da Igrexa de Calo a exposición que O Fervedoiro realizou sobre a figura de Xohán Xesús González, unha das persoas máis interesantes e activas do primeiro terzo do S. XX.

Reencontrarase o cuntiense, político e canteiro, coas xeografías e paisaxes polas que el tanto andou, dende o seu labor sindicalista e polos seus lazos afectivos, baterá de novo con diversos persoeiros desa terra: Enrique Líster que formou parte do exército soviético que loitou contra a Alemaña nazi na II Guerra Mundial, acadando a graduación militar de Xeneral. Foi parte da cúpula do PCE onde tivo importantes disputas con Santiago Carrillo e acabaría fundando o PCOE, Constante Liste tenente alcalde republicano de Teo asasinado vilmente polos golpista en 1936, Bernardo Mato mestre na escola de Campos-Teo, tamén asasinado, Salgado Uribe teense que foi nomeado alcalde de Carbia, actual Vila de Cruces, trala victoria da Frente Popular, logo do golpe escóndese en Compostela e máis tarde en Arzúa onde morrería de tuberculose catro anos despois de ser indultado dun delito de rebelión militar. Xa se reorganiza de novo o recordado Terzo de Calo!

O acto de presentación clausurarase coa poeta galega, unha das máis grandes na actualidade, Elvira Riveiro Tobío, que nos entregara os seus versos, cargados de emotividade, intensidade e compromiso.

 E que mellor sitio que Teo para reinaugurar esta mostra sobre Xohán Xesús que o propio lugar de Calo, que xa de ouvilo ferve o peito, e escoitamos a súa voz, comandando aos valorosos veciños, canteiros e labregos, armados con pouco pero cheos de moito (amor, dignidade, democracia, patriotismo, REPÚBLICA...). A mostra, de entrada libre, estará aberta a todos os públicos no Local Municipal da Igrexa de Calo até o domingo día 22 do corrente mes, co seguinte horario:

• de luns a venres, agás os martes (pechado), de 19 a 21h;
• sábados de 18 a 20h, e
• domingos de 11 a 13 horas.

 A maceta volve a cicelar a efixie do canteiro, do poeta, dramaturgo e político de Cuntis: case se albisca, outrosí, a imaxe de Faustino Liste, de Maximino Castiñeiras, de Ramón Esturao, e de tantos que creron nunha Galiza dona de si, soberana e proletaria, a bandeira galega ondeará de novo cos ventos da USG, e a estrela ha relucir no peito de cadaquén.

 Xa nos tarda o día, as horas descóntanse lentamente aínda que se ouve o verbo dos arghinas de Calo, de Terra de Montes, de Compostela (reconstruíndo a catedral da dignidade), de Cuntis, e de Galiza enteira: comeza a escachar a lousa da desmemoria.

 Agradecidos á Oliveira de Teo.

O pasado xoves, día 8 de outubro, a exposición que realizou o noso colectivo sobre a figura de Xohán Xesús González facía a súa primeira escala. A Gentalha do Pichel, que dende a súa comissom da memoria histórica leva anos reivindicando tamén a figura do canteiro de Sebil, converteuse no primeiro Local Social que acolle a mostra. Damos comezo así ao longo percorrido que queremos que faga polo país este noso traballo, para lle achegar ao maior número de persoas esta importante figura, que coma moitos outros, foron afastados da vida e silenciados (moitos/as aínda desexan que sexa para sempre) polos golpistas do 36.

O acto de presentación da exposición, que estará na Gentalha durante quince días, foi aberto por André Seoane, representante da comissom de memória histórica da Gentalha do Pichel, e que xa nos acompañou cando presentamos na vila do Baño este traballo. Logo dou paso ao noso compañeiro Héitor Picallo que fixo un repaso pola vida e obra do Xohán Xesús, e apuntou entre outras moitas cousas que esta é unha persoa na que queda moito por afondar a pesar dos escasos, porén tremendamente aproveitados, dezaseis anos de activismo nos que chegou a crear ate 4 partidos políticos, traballar en non menos de 25 publicacións periódicas e publicar en vida 8 libros. A presentación rematou cun coloquio entre os/-as asistentes ao acto.

Queremos agradecer o trato recibido polos/as compañeiros/as da Gentalha do Pichel. E  animamos a todos aqueles locais sociais e asociacións a que se mergullen a través desta exposición na vida e obra dun dos moitos persoaxes da nosa terra que as balas dos fascistas quixeron borrar da historia e que ninguén máis que o pobo logrou e logrará que perdure! 

 “Guerra civil é o nome do baño de sangue que o golpe de estado desata. A linguaxe pon, así, o signo de igualdade entre a democracia que se defende e o cuartelazo que ataca, entre os milicianos e os militares, entre o goberno elixido polo voto popular e o caudillo elixido pola graza de Deus.” Eduardo Galeano.

O vindeiro 8 de outubro, ás 20:00 h., o C.S. A Gentalha do Pichel (R/ Santa Clara, 21. Compostela) inaugura a exposición elaborada pola Asociación O Fervedoiro que leva por título Xohán Xesús González: Porta dun futuro proletario. Durante 15 días os/as composteláns/ás poderán ver esta mostra monográfica sobre o canteiro de Sebil que acadou un posto na historia da cultura, política e dignidade galegas, xa que logo dunha intensa vida de sacrificios e proxectos foi fusilado polos fascistas no cemiterio de Boisaca o 12 de setembro de 1936.

Xohán Xesús González foi unha persoa polifacética, que dominou todos os xéneros literarios (poesía, ensaio, teatro e narrativa), que se introduciu no mundo do xornalismo galego, do estado e da Galiza exterior sendo considerado unha pluma moi destacada por aqueles tempos nos que a República brillaba con forza e comezaba a verse un horizonte prometedor para o país galego.

Fundou varias agrupacións políticas (Agrupación Nazonalista de Compostela, USG, Agrupación al servicio de la autonomía, VIR...), varios xornais (El País Gallego, Amañecer e Trabajo), empresas do mundo editorial (como Niké, en colaboración con Arturo Cuadrado) e, sobre todo, moveuse polo terreo da dignidade e lealdade a Galiza.

A partir das 20:30h está previsto que Héitor Picallo, en representación do Fervedoiro, dea unha pequena conferencia sobre Xohán Xesús González, aínda que a idea tamén é que se abra unha exposición de ideas, opinións e debate entre o público asistente.

A Gentalha do Pichel é un colectivo que ten bourado moito na recuperación da figura de Xohán Xesús González polas terras de Compostela, non sen atrancos de cando en vez, polo que é de aplaudir a súa achega na dignificación deste persoeiro esquecido dende o Golpe Militar de 1936 e prolongada esta omisión (consciente as máis das veces) ao longo da ditadura. Ben certo é que o de Sebil se mantivo firme en varios puntos do seu ideario político. Era socialista, nacionalista de base e marxista, de aí que houbese persoas (sobre todo aos do círculo de Ramón Piñeiro) aos que lles molestase non só a figura, senón incluso tales ideas.

Dentro do nacionalismo buscaba unha España confederada, na que cada estado ibérico fose quen de decidir o seu futuro; porén, no caso de non conseguir esta autonomía para Galiza, Xohán Xesús apostaba pola independencia plena.

Todo isto reflíctese nos quince paneis que a partir do 8 de outubro se poderán ver na cidade compostelá.

A asociación veciñal d´O Portavezal vai inaugurar o vindeiro sábado 10 de outubro a senda peonil da Ponte do Ramo. Xunto con eles colaboran nesta activadade unha serie de entidades entre as cales se atopa a nosa asociación.

Ler o resto da entrada »

26 de setembro foi o día escolleito polo Fervedoiro para realizar a II Limpeza simultánea de ríos, coordinada dende O Proxecto Ríos (da asociación ADEGA).

Ler o resto da entrada »

Aínda que será o vindeiro 27 de setembro cando diversos colectivos galegos se poñan as botas para participar na II Limpeza Simultánea de Ríos, O Fervedoiro realizarao –por razóns varias- o día anterior, o sábado 26.

Ler o resto da entrada »

Organizar un festival así só se consegue coa calculadora na man e moitas pernas colaborando. O resultado: outro verán máis de Festidoiro,  ou o que é o mesmo, de aposta pola música feita en galego.

Ler o resto da entrada »

Onte xoves, 13 de agosto, presentamos en rolda de prensa o Festidoiro 09´, a continuación reproducimos integramente o comunicado do que fixemos lectura..

Ler o resto da entrada »

O 17 de xullo, día que O Fervedoiro presenta o libro de David Otero Alexandre Bóveda: na demanda de restauración,

Ler o resto da entrada »