SIDEBAR
»
S
I
D
E
B
A
R
«
Quen defende o noso Patrimonio?
Mar 25th, 2015 by ofervedoiro

Remataron as obras que se viñan desenvolvendo na contorna da depuradora de Meira dende o verán de 2014 e as consecuencias para a zona resultan desoladoras.

lodos no último tramo dos Pasos O compromiso adquirido co noso colectivo, en xullo de 2014, pola empresa que efectuou a obra para a retirada dos lodos que ocultaban o último tramo dos Pasos, non foi executado. É máis, a simple vista pódese observar como unha das pedras que forma parte do conxunto etnográfico (de claro interese cultural e arquitectónico) aparece agora nunha nova posición que nada ten que ver coa inicial. Esta alteración fai moi perigoso empregrar os Pasos para sortear o río Gallo .

Ata o momento, o goberno local mantén a súa tradicional ausencia neste tema. Entendemos que o seu silencio dá por boas as actuacións que alí se realizaron e que en ningún momento chegaron a esixir as medidas oportunas para salvagardar o patrimonio de todas e todos nós.

O estado no que quedou o chan que forma parte da contorna da EDAR é outro testemuño máis da falta de interese amosado pola administración local. As rodeiras de camións e mesmo os cascallos que estragan o firme ameazan con agravarse coas primeiras choivas. Dúas novas tubaxes cara ao río Gallo, sen ningunha función aparente, póñenlle o ramo ao esperpento.

 Unha vez máis, os actos falan máis alto e claro que as palabras ou a ausencia delas. Resulta inexplicable o absoluto desprezo por parte do goberno local cara aos Pasos dende que comezáramos co proxecto “Arredor da Auga”. Plan que, entre outras actuacións, contiña a restauración e posta en valor deste conxunto de elevado interese, tanto é así que foi valorado por colaboradores da Real Academia Galega a comezos do século XX. A día de hoxe, despois destas obras, seguimos sen entender como é posible semellante desleixo cara a este  elemento arquitectónico. Máxime cando ben podía constituír unha das imaxes da promoción turística do noso concello. Como pode continuar a ser tratado con absoluta indeferenza por quen ten a obriga de velar pola súa conservación?

Agardamos respostas e, sobre todo, actuacións. Non á pasividade!

Salvemos os #PasosDeMeira
Feb 25th, 2015 by ofervedoiro

Quen protexe o noso patrimonio?

Qué acontece nos Pasos de Meira?
Feb 19th, 2015 by ofervedoiro

Fora concretamente o 18 de xullo de 2014 cando denunciábamos certas obras que se estaban a facer cabo da EDAR de Meira, e non era porque estivésemos en contra do saneamento (senón todo o contrario), a favor estamos, mais certos amoreamentos de escombros e un pouco tacto á hora de tratar os “Pasos de Meira” (elemento etnográfico de notable interese) espertaron a nosa curiosidade para que, dende o Concello, nos desen resposta.
comezo das obras no verán de 2014
Resposta que nunca tivemos (só de membros da empresa que realiza esas actividades de saneamento), aínda que subliñamos que era mester da administración local velar pola conservación do estado das nosas augas e, como non, do patrimonio histórico artístico e etnográfico. A empresa, na reunión que tiveramos con diversos responsables, comprometeuse con este colectivo en deixar o elemento etnográfico tal e como estaba, e facendo fincapé que ían limpar os lodos acumulados na zona Leste dos Pasos (ou sexa, na ribeira dereita do río).
dous elementos de pedra moi semellantes aos Pasos
Este elemento, cómpre facer memoria, fora restaurado polo Fervedoiro había un tempo para goce e ledicia non só da veciñanza, senón tamén dos visitantes e alumnado do Colexio Público Aurelio Marcelino Rey (Cuntis). Cómpre recordar, así mesmo, que a administración local non puxo un só céntimo no proxecto “Arredor da Auga”, proxecto no que se desenvolveron diversas fases de actuación: catalogación do patrimonio do río Gallo ligado á auga, limpeza dos lavadoiros fluviais, restauración dos “Pasos de Meira”… Nin un só céntimo cando, noutras ocasións, hai para cousas superfluas que non colaboran ren na conservación dos nosos espazos naturais e bens culturais.
comparativa novembro 2012 - febreiro 2014
Na actualidade, segundo cremos entender, na EDAR estanse a rematar as obras de saneamento. Mais resulta curioso que vexamos no remate dos Pasos de Meira, no lateral Leste (ribeira dereita do río) como varios sacos de area ou doutros materiais se acumulan nesa zona, descoñecendo se están a danar ou non os chanzos pétreos do conxunto etnográfico. Tamén temos percibido que hai varias pedras, de considerables tamaño, cunha tipoloxía semellante á dos citados chanzos que semellan substraídas do seu lugar de orixe, porén ignoramos a súa procedencia e é por iso que queremos preguntar á administración local (representada polo alcalde, polo concelleiro de Cultura e polo concelleiro de obras) se saben algo sobre este asunto. Preguntar tamén que, de seren substraídas (coidamos que temporalmente) hai ou non as autorizacións respectivas. Preguntar se ven lóxico ese amoreamento de sacos de area (ou xabre) enriba dos pasos. Preguntar se realmente están a loitar pola conservación do patrimonio comunitario e público, ou sexa, o que é de todas e todos.
Agardemos que digan algo, e que non fagan como é habitual, dar a calada por resposta.
Preme AQUÍ para ver máis imaxes.
O seu exemplo é a mellor lección
Dec 18th, 2014 by ofervedoiro

Nun Estado no que as víctimas e os represaliados do fascismo xamais foron recoñecidos nin rescatada a súa memoria tócalle á sociedade consciente facer camiño e esixir Xustiza e recuperar as súas historias, que ao fin e o cabo é a historia da Democracia e os Dereitos Humanos.

Pois a Transición española xamais esixiu responsabilidades políticas polos crimes acontecidos durante a dictadura, nunca se depuraron os aparatos do Estado e os fascistas seguiron nos seus cargos e incluso moitos ascenderon, foron premiados e condecorados.

A pesar de que a desaparición é un crime de lesa humanidade que non prescribe nunca, en 76 anos non se xulgou nin un só caso deles; e perante esa impunidade son agora os xuíces arxentinos os que están a investigar os delictos cometidos polo franquismo.

É por esa razón que dende o noso colectivo non queiramos ser cómplices do silencio e esquecemento impostos, dende o compromiso e a solidariedade dedicamos ano tras ano un espazo dentro da nosa actividade para restabelecer a dignidade das persoas asasinadas e represaliadas dentro do concello de Cuntis e, por extensión, do pobo galego.

Antonio Caeiro na proxección d´A volta dos noveAsí foi como o sábado pasado tivemos ocasión de ver, e entender, o documental “A volta dos nove”, traballo de Antonio Caeiro no que recupera a historia de nove persoas que foron executadas por vinganza na zona do val Miñor; amosando un dos numerosos actos protagonizado polos pistoleiros falanxistas que tralo golpe de Estado de 1936 actuaron con total impunidade e escasa oposición na nosa terra.

E onte mércores percorremos as rúas e as prazas da vila do Baño con alumnos e alumnas do CPI don Aurelio de Cuntis, no que denominamos Roteiro da Memoria e que xa vimos realizando dende hai catro ano. A través deste percorrido recordamos parte da vida e obra de moitas das persoas represaliadas por defender a Democracia: persoas relevantes da cultura cuntiense e galegas (como Uxío Souto, Xohán Xesús González e Roberto Blanco Torres, entre outros), como xentes humildes, de oficios sinxelos e duros (como amas de casa, canteiros e labregos que sufriron presidio o fusil), ou incluso persoas do eido da educación que levaron igual fortuna entre reixas (mestres de Xinzo, Magán e Cuntis, entre outros). Recordouse a memoria tamén dos fuxidos, dos paseados, dos axustizados, dos condenados e dos que foron apuntados co dedo e burlados no antigo paseo da vergonza (que naqueles tempos de borralla e sangue discorría pola rúa da Presiña, onde estaba a prisión e a casa do Concello, a Praza do Ferrol e a rúa do Balneario).

Co alumnado do CPI don Aurelio durante o Roteiro da Memoria

Membros do equipo educativo do CPI de Cuntis puideron relembrar a historia do represaliado D. Aurelio Marcelino Rey García, mestre cuntiense que pasou polo campo de concentración franquista da Illa de San Simón e que hoxe é recordado nese centro de ensino que leva o seu nome, tal acontece coa circunvalación que discorre pola vila de Cuntis. En decembro, coma xa hai anos, no Fervedoiro rescatamos dos naufraxos da desmemoria o recordo das/dos demócratas (asasinadas/os ou represaliadas/os) que loitaron polos Dereitos humanos, pola República e pola Democracia.

Para nós o seu exemplo é a mellor lección, a voz dun exterminio lento e consentido onde se encolle o corazón pero xamais a dignidade.

A memoria da memoria
Dec 11th, 2014 by ofervedoiro

cartaz xornada 13.12.14

Memoria, dignidade e xustiza
Dec 9th, 2014 by ofervedoiro

Castigar aos opresores da liberdade é clemencia, perdoalos é barbarie.” Maximilien Robespierre.

Proxección A volta dos 9 O 15 de outubro de 1936 un grupo de falanxistas asasina na Enseada da Bombardeira, preto de Baiona, nove persoas (Felicísimo, O Ghonda, O Lijó de Corrubedo, O Rei Quiquito, Fidel, O Pelonio, O Ferreiro do Burgo, Generoso e Manuel Aballe), os máis deles mariñeiros e afiliados a sindicatos anarquistas. Días antes da matanza, dous irmáns, os Ineses, un anarquista da CNT e outro sindicalista da UXT, que vivían agochados dos falanxistas, deran morte a un garda civil cando os fascistas entraron na casa a detelos. No asalto morren os dous irmáns e outras dúas persoas que viven alí. Ademais, a vinganza dos falanxistas acaba coa vida destas outras nove persoas, que foron sacadas dos calabozos de Vigo. Porén, dende entón cada 15 de outubro aparecen no lugar, xa coñecido coma a Volta dos Nove, outras tantas cruces, unha por cada executado. Os franquistas tentaron saber quen as pintaba pero cada ano volvían aparecer as nove cruce pintadas para lembrar o sucedido.

Esta é a historia do documental “A volta dos nove”, que proxectaremos na biblioteca municipal “Roberto Blanco Torres” de Cuntis o vindeiro sábado 13 de decembro ás 12 horas. Unha peza máis que Antonio Caeiro achega ao sacrificado proceso de recuperación da Memoria Histórica. Ao remate da proxección teremos unha mesa redonda con Margarita Teijeiro (documentalista) e o propio Antonio Caeiro.

Pero esta non será a única actividade que O Fervedoiro desenvolverá ao longo deste mes da memoria. Outra das actividades, na que colabora o CPI Don Aurelio Marcelino Rey de Cuntis, terá lugar na mañá do mércores día 17 de decembro. Coma noutras edicións, a Memoria Histórica tamén chegará aos alumnos deste centro, polo que se fará un percorrido polos lugares máis emblemáticos ligados a esta temática. O periplo histórico discorrerá polo cemiterio municipal, a Circunvalación don Aurelio, as rúas Uxío Souto, Castelao, A Presiña,… a rúa Xohán Xesús González e Olimpio Arca, a igrexa parroquial, a Praza das Árbores, a rúa do Balneario, A rúa do Cruceiro (hoxe Bernardo Sagasta), e Trasponte,… Alén de persoas destacadas deste concello e vila fusiladas ou represaliadas tras o golpe militar de 1936 tamén achegará a listaxe de todas aquelas persoas cuntiense que pasaron polo campo de concentración da Illa de San Simón ou outros.

Haberá tempo para falar do escultor Uxío Souto, dos escritores Xohán Xesús González e Roberto Blanco Torres, e do mestre (que dá nome á circunvalación da vila e do CPI) Don Aurelio… O agrarismo, as publicacións locais e comarcais e o roteiro “Ho Chi Minh” (ruta clandestina pola cal se introducía publicidade de organizacións políticas durante a clandestinidade PSG, PC e UPG) han ser outros puntos a tratar.

Deste xeito, tal e como vimos facendo dende varios anos, colaboramos coa recuperación da nosa historia, da nosa identidade e da memoria, que ao fin e ao cabo e recuperarmos Dereito, Liberdade, Igualdade, Fraternidade, República e Democracia.

A volta dos nove
Dec 4th, 2014 by ofervedoiro

Dende 2011 cada mes de decembro o noso colectivo ten unha cita anual coa Memoria Histórica, sometida ao esquecemento e tan necesaria para entender moitos dos acontecementos do presente. 
O noso compromiso sigue firme e xa vos podemos ir adiantando que o sábado 13 de decembro ás 12 do mediodía teremos a proxección do documental “A VOLTA DOS NOVE”, un traballo de Antonio Caeiro.
Ao remate contaremos cunha mesa redonda na que participarán o director e Margarita Teijeiro, responsable de Documentación neste documental.

Tesouros da Natureza (II)
Nov 4th, 2014 by ofervedoiro

Coincidindo coa Semana da Ciencia vimos de instalar no CPI don Aurelio Marcelino Rey de Cuntis unha exposición de minerais, rochas e fósiles.

Mostra Minerais, rochas e fósiles

A mostra que xa foi realizada o pasado curso conta desta volta con novos materiais que se engaden aos xa expostos, sumando así máis de medio cento de pezas de pequeno e gran tamaño.

O obxectivo desta actividade é dar a coñecer o mundo xeolóxico e paleontolóxico aos/-as alumnos/as do devandito centro e para que sirva como complemento das materias de ciencias.

Esta mostra está aberta a todo o público en horario escolar, de luns a venres pola mañá (de 9:00 a 13:30) e os martes tamén pola tarde (de 16:00 a 18:00).

Preme AQUÍ para ver máis imaxes da actividade.

 

Un petisco de Historia das nosas augas
Out 21st, 2014 by ofervedoiro

Este pasado sábado, 18 de outubro de 2014, cumpríronse 150 anos da poxa dos dereitos sobra as Augas Termais da vila do Baño (Cuntis). Por este motivo a Plataforma Veciñal Na Defensa Do Patrimonio Termal publicou o video que vos deixamos a continuación.

Na limpeza do Gallo
Out 7th, 2014 by ofervedoiro

Voluntariado en marcha

Voluntariado en marcha

Comezamos, no barrio da Ponte, a iso das 10:30 da mañá. Varios membros do Fervedoiro e un grupo constituído por voluntarias e voluntarias (algúns deles nenos) dirixímonos ao punto onde habitualmente realizamos as inspeccións anuais. Alí fóiselles explicando aos cativos que é o PH e que significa acadar determinados niveis de nitratos en disolución. Provistos do equipo de mostreo (cos tubos de ensaio, as pastillas indicadoras de determinadas concentracións), obtívose un nivel de PH 6,5 (o que sinala que temos unhas augas, as do río Gallo, lixeiramente ácidas), unha concentración de osíxeno diluído en auga de 4 miligramos por litro (mg/l). Este último é un indicador do grao de contaminación do líquido elemento. O ideal é que nos dese un nivel comprendido entre 7 e 12 mg/l, polo que a auga do Gallo non se atopa, dende ese punto de vista, demasiado osixenado, polo que non favorece a supervivencia de peixes e outros organismos. Outro dos parámetros fisico-químicos é o control de nitratos, elementos que aínda que indispensábeis para a vida animal en cantidades elevadas son moi perigosas. No tocante a este asunto deunos unha concentración de 5 mg/l.

Na zona inspeccionada (tramo que forma parte do noso proxecto “Arredor da Auga“) a auga tiña unha velocidade aproximada de 0,6 m/s, e tiña un nivel moi aceptable de diafanidade. Así mesmo constatouse a presenza de escumas en suspensión en distintos tramos inspeccionados (tanto en zona urbana como xa nas ribeiras rurais do río) amais de vertidos pequenos de aceites e outras substancias nocivas para o medio ambiente.
A continuación, procedeuse a retirar do leito do río lixo e restos inorgánicos daniños. Velaí que se puidesen extraer arames, plásticos, restos de electrodomésticos, elementos metálicos varios,… Porén non nos resultou posíbel extraer unha bicicleta que, por estar soterrada no río complicou a operación e non poucas uralitas. Destes últimos residuos informaráselle a administración local para que procedan a retiralos cos medios oportunos pois, como é ben sabido, estes produtos elaborados polo ser humano en base minerais metamórficos como o amianto (ou asbesto) poden producir no ser humano (e por extensión no dos animais) enfermidades moi perigosas. Como carcinóxeno que é o amianto pode ocasionar asbestose, cancro de pulmón ou mesoteliomas pulmonares.
A xeira remata sobre as 14:00 horas e, alén do datos recompilados e a inspección realizada, recolléronse aproximadamente 250 quilogramos de lixo, máis da metade do que se ten recollido noutras ocasións (onde foron recollidos 600 kilogramos de lixo).
Para nós, foi unha mañá moi gratificante pois puidemos comprobar como as vindeiras xeracións de nenas e nenos de Cuntis tamén se están a interesar en bo grao no estado de saúde destas augas que, por certo, son de todas e de todos.
Limpeza do Gallo
Out 2nd, 2014 by ofervedoiro

“Queremos uns ríos limpos, queremos poder disfrutar dos nosos sistemas fluviais e queremos concienciar á sociedade da necesidade de que estes estean ben conservados”. É así como se define a VII Limpeza simultánea, impulsada dende o Proxecto Ríos, e que oficialmente xa se levou a cabo na maior parte do país este pasado domingo 28 de setembro. 
Porén, o noso colectivo, que xa estivo presente en case que todas as edicións anteirores, vaino celebrar este vindeiro sábado, 4 de outubro, a partir das 10.30 horas. O punto de encontro será na rúa Bernardo Sagasta, a carón da Ponte.  
Cartaz da VII Limpeza Simultánea de Rios
Malia que coa realización deste tipo de actuacións e a concienciación e sensibilización da cidadanía logrou mellorar o aspecto dos ríos, aínda queda moitos residuos que degradan os nosos ecosistemas fluviais. Por iso volvemos, unha vez máis e as que fagan falla, a actuar na defensa e conservación do Río Gallo.  
Se queres ser  partícipe desta nova acción, da renovación dos ecosistemas que tamén son teus e de todos, só tes que nos enviar os teus datos (nome, apelidos e nº de DNI) ao noso enderezo electrónico: ofervedoiro@hotmail.com
Todas e todos facemos falla para mudar o aspecto da nosa contorna, todas e todos somos responsables. In situ, mediremos o PH do noso río, os niveis de Nitratos e Osíxeno, a velocidade das augas e identificaremos parte da fauna invertebrada existente. Noutro momento, recolleranse sólidos contaminantes que poidan estar no seu leito.
Porque nós si cremos nun outro mundo posible, nunhas outras augas máis limpas, nun mundo máis responsable e respectuoso co entorno e o medio ambiente.
 
Ponte as botas… e móllate polo Gallo!!!
Fervor billardeiro no templo dos Albariños
Set 23rd, 2014 by ofervedoiro

A alianza Liga Nacional de Billarda O Fervedoiro continúa imparábel sumando novos aliados á causa por todo o territorio do Umia. Van catro edicións do noso Aberto e a xulgar pola paixón amosada polos/as fieis que se achegaron o sábado aos Albariños este xa é un evento consagrado dentro do universo estornela.

A tropa do varal

A tropa do varal

Un ano máis até a aldea de Guimarei foron chegando as devotas e os devotos do varal para entregarse en corpo e alma á práctica deste deporte tradicional e vibrar cun novo e apaixoante Aberto de Billarda de Cuntis.

E por segundo ano consecutivo os/as da casa sairon a conquistar o torneo con afouteza e corazón, enchoupados/as da máxica poción amosaron dende o primeiro minuto que non estaban dispostos/as a perder a concentración a pesar do ambiente festivo que envolveu o esceario da batalla. Loitaron así até o final por alcanzar o ceo billardeiro e inscribir para sempre o seu nome no olimpo do varal.

Varado a varado e xunto a Pepe da Laracha e dous compoñentes de Suévia F.G., Guilhe e Odilo, presentáronse na gran final os locais Diego Magariños e Miguel Gontad. Este último, que facía o seu debút en competición, rematou por levarse o campionato a base de certeiros e bravos estouridos que o converteron no segundo palanador nado a beira do Gallo que se fai co mítico aberto cuntiense.

Abriron o evento as compañeiras e compañeiros de Suévia F.G. que nos achegaron as liñas mestras e a historia do fútbol gaélico nunha animada conversa antes do xantar de confraternidade. Xa na tarde o grupo de cantos de taberna Os Saljariteiros encheron de música a cita co varal. A elas e a eles, as compañeiras e compañeiros de Quinteiro do Umia, a Pepe da Laracha e a sua tropa que puxeron a nosa disposición todo o arsenal billardeiro que atesouran, a xente da LNB e a quen non puxo excusa por formar parte desta xornada agradecémoslles que apostaran por encumiar o IV Aberto de Billarda de Cuntis.

 Billarda sempre… alegre e combativa!

Para que non te perdas
Set 18th, 2014 by ofervedoiro

Aquí vos deixamos un mapa para facilitarvos a localización da Área dos Albariños. Nel sinálase unha das ruta que se pode percorrer dende o centro da vila do Baño dirección A Estrada, pola N-640. A menos de 3 Kms atópase o desvio cara a aldea de Guimarei, onde está a área recretiva. De todos xeitos, sinalizaremos a entrada do desvio da N-640 e na propia aldea para que sexa máis doado seguir a folla de ruta.

sinal d´Os Albariños

Vémonos no campo de batalla! Avante co Varal!

localización d´Os Albariños

localización d´Os Albariños

Xa está aquí o IV Aberto de Billarda
Set 16th, 2014 by ofervedoiro

Cartaz IV Aberto de Billarda (20.09.14)Un ano máis enfundámonos a casaca do activismo billardeiro para volver co firme impulso dos puños pechos a autoxestionar e coordinar a cuarta edición do Aberto de Billarda de Cuntis. Confirmamos así que dende aldea de Guimarei e para a toda bisbarra do Umia mantemos acceso o lume que no seu día prendeu a xente da LNB (Liga Nacional de Billarda) para rachar coa longa noite de pedra na que estaba mergullado este xogo tradicional e propagalo de novo por todo o país.

O verde d´Os Albariños formará parte, unha vez máis,  da paisaxe dunha nova xornada de varal e confraternidade. Coma nos vellos tempos a vontade popular fará posíbel revivir outra xornada para eses libros da historia que non ensinan nos colexios, esa mesma que escribe a xente do común e que endexamáis publicarán os herdeiros das belle époques.

O sábado 20 de setembro sobre este mítico espazo da aldea de Guimarei non só medirán as súas destrezas co varal os palanadores e as palanadoras chegados dende toda a comarca, a programación que se desenvolverá ao longo de toda a xornada festiva pretende ir máis alá:

  • A partir das 12.30 horas contaremos coa presenza das compañeiras e compañeiros de Suévia F.G. que nos van a dar a coñecer as regras básicas do Fútbol Gaélico, para logo poder gozar e mesmo participar dunha pequena exhición deste deporte que está a brotar de xeito imparábel por todo o país.
  • A partir das 14.30 horas será tempo para sentar ao redor da mesa e o mantel e xuntar forzas para logo disputar o Aberto de Billarda que se converterá no protagonista principal a partir das 16 horas. (Contacta con nós para facer a reserva do xantar: ofervedoiro@hotmail.com)
  • Logo da protocolaria entrega de premios e para pór o peche ao IV Aberto de Billarda contaremos coa música ao vivo do grupo de cantos de taberna “Os Saljariteiros”

Para acudir á chamada da forza do palán o único requisito esixido é deixarse levar pola tolemia que desprende o mítico teatro dos soños billardeiros cada vez que se engalana para a ocasión e que axuda de maneira máxica a facer bruar as billardas para que sobrevoen o campo dos Albariños.

Que non cho conten! Acude e participa na revolución do varal!

Spot do IV Aberto de Billarda
Set 11th, 2014 by ofervedoiro

Da man de Quinteiro do Umia  un ano máis chega as nosas pantallas o spot do IV Aberto de Billarda de Cuntis,  velaí o brutal estalo promocional!

 

»  Substance:WordPress   »  Style:Ahren Ahimsa