SIDEBAR
»
S
I
D
E
B
A
R
«
Que fai O Fervedoiro?
Outubro 28th, 2006 by ofervedoiro

 

Xuño.06 – Asinamos pola conservación dos Penedos de Traba e Pasarela.

18.07.06 – Conmemoramos o setenta aniversario do levantamento militar do 36, lembrando en Asemblea aos integrantes cuntienses do Comité Revolucionario e aos veciños represaliados na Illa de San Simón.

18.07.06 – Apoiamos a iniciativa de MpDC, asinando en Internet o documento en contra da Agresión do Exército israelí sobre a poboación do Líbano

18.07.06 – Aderímonos como colectivo a Siareiros Galegos, en prol dunhas seleccións deportivas galegas oficiais.

20.07.06 – Rexistramos no Concello de Santiago de Compostela a proposta de lle conceder o nome do ilustre cuntiense Xohán Xesús González a unha rúa da capital galega. Ao tempo, difúndese a iniciativa na rede e iniciase unha recollida de apoios que recibe rapidamente interesantes respostas.

28.07.06 – Rexistramos no Concello de Cuntis a denuncia do estado actual do vertedoiro, ao noso ver incontrolado, situado detrás do Centro Ocupacional d’A Ran.

15.08.06 – Deseñamos e vendemos as camisetas que, con motivo das Festas de Agosto ’06 (de novo no Campo da Feira), recollen a voz d’O Fervedoiro e que expresan, baixo o título de “As leis de CelaKuntis” e de xeito irónico, o estado actual do pobo cuntiense.

26.08.06Celébrase a Presentación Pública na Casa da Cultura “Roberto Blanco Torres”. Xunto a convidados como Avelino Pousa Antelo, David Otero, Lois Bóveda e outros representantes da cultura e de importantes asociacións galegas, asisten numerosos veciños que ateigan o local da Vila do Baño. É de salientar a numerosa presenza de mocidade cuntiense, así como de varios familiares do lembrado Xohán Xesús González. O acto consta fundamentalmente de tres partes: 1.presentación do colectivo como tal, na que se da conta dos principios constitutivos e das actividades realizadas até o momento; 2.palabras dos convidados, nomeadamente Lois Bóveda, David Otero e Avelino Pousa; e 3.remate con recital poético a cargo de Fernández Abella e Martinho Picallo, co acompañamento musical de Francisco Campos.

04.09.06 – Apróbase o documento interno de posicionamento diante da catástrofe ecolóxica ocorrida a raíz do accidente nunha pranta química de Caldas de Reis.

16.09.06 – Rexístrase no Concello unha denuncia dos vertidos no Gallo e en diversos regatos que levan augas ao Umia, así como neste río. O Fervedoiro cre necesario erguer a voz nun caso que non ocupa minutos de televisión nin follas de xornais, especialmente en tempos nos que por mór do ocorrido logo do incendio dunha empresa química en Caldas de Reis algunhas administracións anuncian planos de protección e rexeneración de ríos. Os medios de comunicación adícanlle atención ao vertido en Caldas mais non aos ocorridos acotío augas arriba, por exemplo, en pleno centro do noso pobo.

25.10.06 – Membros de ADEGA visitan connosco varios puntos que citabamos na denuncia do 16 de setembro sobre os verquidos ilegais ao Gallo e ao Umia e mailo estado da EDAR de Meira. Comprobamos como nada mudou dende aquela agás que debido ao remate das obras que se viñan realizando no centro da vila deixou o Gallo de levar graxas, pinturas, etc. Os dous colectivos decidimos manter os contactos para estudar as accións a realizar no tocante a estes feitos.

17.11.06 – O Fervedoiro celebra a Conferencia “O Terzo de Galegos. Douscentos anos de historia (1806-2006)” que serve como homenaxe a este glorioso batallón que fora decisivo na defensa de Buenos Aires durante a invasión inglesa. O acto ten lugar na Casa da Cultura “Roberto Blanco Torres” e é impartido pola actual Comandante deste Terzo Don Horacio Vázquez, o principal reponsable da recuperación histórica deste batallón e dos máis importantes traballos relacionados con esta esquecida historia. Ao acto son convidados os Alcaldes da comarca e Corporación de Cuntis, ningún responsable político asiste (tan só un membro da oposición cuntiense se excusou), o que consideramos un desprezo ao noso convidado.

20.11.06 – Rexistramos no Concello de Cuntis a solicitude de retirada da simboloxía fascista que aínda permanece no noso pobo. Logo do traballo de localización, fixemos coincidir a nosa iniciativa coa simbólica data do cabodano do ditador que afogou a nosa Terra.

20.11.06 – Como parte da Campaña de normalización lingüística no protocolo funerario, enviamos unha carta ás cinco empresas funerarias con presenza no noso pobo presentando a iniciativa, argumentando e convidándoas a contribuír no proceso normalizador.

28.12.06 – Organizamos a viaxe ao encontro internacional de futbol entre a nosa Selección e a de Ecuador. Mobilízanse dende Cuntis máis de 65 persoas (alguns/has vidos/as dende concellos veciños), desprazando a medio cento en autobús dende esta vila. A organización no contou con ningún tipo de subvencion económica nin axuda de ningún tipo por parte de ningunha entidade pública nin privada.

10.01.07 – Aderímonos á iniciativa “Deamos o primeiro paso. Entidades Galegas pola Redución dos Residuos” manifestando o noso compromiso na xuntanza celebrada en Compostela.

25.01.07 – Ao sermos sabedores da celebración en Cuntis do Campionato Galego de Caza de Raposo, e coñecendo as informacións que falaban de verdadeiras masacres en actos semellantes nas últimas datas, manifestamos a nosa preocupación e desexo de que todo se celebrara correctamente remitíndolle cartas á FGC, á DX para o Deporte e á Sociedade de Caza de Cuntis.

06.02.07 – O Fervedoiro engádese, de facto, á iniciativa pola reivindicación do dominio galego na rede asinando entre os apoios á Asociación Puntogal.

12.02.07 – O Fervedoiro manifesta o seu incondicional apoio ao historiador de Cerdedo Dionisio Pereira, denunciado por familiares de fascistas trala publicación nun dos seus libros dos nomes e apelidos dalgún dos represores durante a Ditadura Franquista.

03.03.07 – O Fervedoiro organiza o debate “Proceso de Reforma Estatutaria en Galiza“, que ten lugar na Casa da Cultura “Roberto Blanco Torres” de Cuntis. Na procura do maior abano posíbel de opinións e puntos de vista, convídase a participar ás seguintes forzas políticas: BNG, PSOE, PP, Nós-UP, EU-IU, FPG e PG. Finalmente asisten o Partido Popular (Xesús Palmou), Esquerda Unida (Fernando Ramos) e Nós-UP (Maurício Castro) e rexeitan sentarse na mesa do debate as restantes organizacións, salientando a negativa do “bipartito” (PSOE e BNG). Todo transcorre polos vieiros da normalidade e rexístrase unha gran afluencia de público. Ten de histórico o acto que por primeira vez tivo lugar un debate político e público entre unha forza independentista galega (Nós-UP) e o Partido Popular.

08.03.07 – Apoiamos o manifesto da Asociación Ken Keirades (A Estrada) elaborado con motivo do Día Internacional da Muller Traballadora

31.03.07 – O Fervedoiro denuncia a aparición de centos de troitas mortas no Río Gallo, ao seu paso polo centro da vila. Ao parecer, débese a un novo vertido tóxico de procedencia descoñecida. Esíxense de inmediato responsabilidades e o coñecemento da verdade, así como que os culpábeis sexan debidamente sancionados.

02.04.07 – Ao igual ca o que acontecera un mes antes, de novo aparecen despoxos de carne animal tirados no monte de Calvos. Desta vez é O Fervedoiro quen, mantendo a liña de denuncia dos escándalos ecolóxicos, da a coñecer a nova e difunde as imaxes que incluso conteñen o selo do matadoiro do que procede a carne. Todo parece indicar que este feito pode ser definitivo e de grande axuda nunha suposta investigación, de esta existir.

03-04-07 – O Fervedoiro convoca unha concentración no Rió Gallo para exixir responsabilidades pola desfeita ecolóxica da fin de semana pasada que rematou coa morte de centos de troitas, escalos, miñocas, etc. Colocouse unha faixa coa lenda “Non matemos as nosas augas” na ponte de madeira e sinalouse a prohibición de pescar diante da evidente contaminación do río.

14-04-07 – O Fervedoiro asiste ao homenaxe que a A. C. Ken Keirades da Estrada organiza na lembranza de Manuel García Barros, na súa aldea natal de Berres.

21-04-07 – Celébrase en Cuntis o acto de inauguración das rúas Xohán Xesús González e Olimpio Arca. O Fervedoiro, como impulsor da primeira proposta está presente, malia non contar para nada na homenaxe por parte da Corporación cuntiense.

21-04-07 – Logo de desaparecer a faixa colocada no Gallo a semana anterior e ser atopada no propio leito do río uns metros máis abaixo, procédese á súa recolocación na mesma ponte na que fora colocada nun primeiro momento. Segue sen coñecerse nada da investigación ni da autoría do escándalo ecolóxico que dera pe á dita faixa.

24.05.07 – Con motivo da celebración das Xornadas Culturais, o CPI Don Aurelio Rei, de Cuntis, convida ao Fervedoiro a participar organizando a actividade “Degradación do medio ambiente”, que constou dunha pequena conferencia cos alumnos e alumnas de 4º da ESO nas que puidemos ver algunhas das imaxes que contribúen precisamente á degradación do entorno. Deseguido realizamos un roteiro pola beira do Gallo comprobando o estado de sumidoiros e demais “puntos negros”, incluíndo a depuradora de Meira.

02.06.07 – Estamos presentes na xornada organizada por Siareiros Galegos en conmemoración daquel primeiro encontro reivindicativo desputado na Estrada no ano 97. Colaboramos na distribución de entradas e na publicitación, asistimos ao partido de Santa Isabel e posteriormente ao concerto en Compostela.

06.06.07 – Denunciamos un novo vertido ao Gallo. A elevada frecuencia coa que o noso río padece este tipo de agresións tornan máis grave aínd ao problema. Desta volta, todo apunta ás obras que se están a realizar e á rotura, consecuencia delas, dunha tubaxe dos sumidoiros que achega augas fecais e residuais ás augas do Gallo.

06.06.07 – Remitimos á RAG a proposta para que Xohán Xesús González sexa homenaxeado co Día das Letras Galegas. Nas vindeiras semanas comezarase a difusión e promoción da candidatura. É un paso máis no traballo de recuperación da memoria e dignificación da figura deste ilustre cuntiense.

16.06.07 – Asistimos, como colectivo convidado, ao III Encontro de Voluntariado do Proxecto Ríos, en Lourizán (Pontevedra). Ao igual ca o resto de participantes, expoñemos a nosa actividade na comarca no tocante a accións e denuncias medioambientais, especialmente no referente a verquidos ao Gallo. Asimesmo, estamos tamén presentes nas XI Xornadas Independentistas Galegas, organizadas por Primeira Linha en Compostela.

21.07.07 – Inaugúrase na Casa da Cultura “Roberto Blanco Torres” a Exposición “Lume“, composta por 28 imaxes cedidas polos fotógrafos redondeláns Félix e Mundo Cal e que foron tiradas durante o tráxico agosto de 2006 con motivo da vaga incendiaria que tivo lugar en Galiza. Fica exposta durante toda a semana. No acto interveñen o Delegado de Medio Rural, Gonzalo Constenla, e o Xefe do Distrito forestal Caldas – Salnés, Pedro López.

28.07.07 – Ten lugar o acto de peche da exposición, no que interveñen Alberte Vieiro (da AGHN), María Xosé Fuentes (traballadora forestal e delegada de CC.OO.), Lois NOgueira (XORNAGA) e María García (ADEGA)

09.08.07 – Ana Miranda Paz (Vicepresidenta da Alianza Libre Europea, partido do Europarlamento) ofrece en Cuntis, na Casa da Cultura “Roberto Blanco Torres”, a conferencia A globalización e os dereitos dos pobos. Rexístrase unha máis ca notábel asistencia e un elevadísimo grao de participación con preguntas, comentarios, etc.

14.08.07 – Denunciamos a realización das obras do Salto da Ermida, carentes de licenza municipal e a alarmante pasividade das administracións implicadas (Concellos de Cuntis e Moraña). Do mesmo xeito, criticamos a desfeita medioambiental que se produce cos traballos e exiximos a paralización inmediata de tales obras ilegais.

21.08.07 – Rexistramos no Concello de Cuntis a solicitude de paralización das obras do Salto da Ermida.

07-09-07 – Remitímoslle ao Conselleiro de Medio Ambiente unha carta solicitándolle se implique en contra da destrución do medio e dunha outra agresión ao Río Umia: as obras da minicentral da Ermida.

14.09.07 -Celebramos na Taberna O Chiorta (A Anllada, Cuntis) a festa do noso primeiro aniversario. Consta da actuación de tres grupos (Perdemos o Norte e O Duo sen Nome, de Cuntis; e Odio e Amo, de Moaña), a lectura do repaso de actividades do primeiro ano e a proxección dun DVD coas imaxes dende agosto de 2006.

27.10.07 – Organizamos o “Roteiro polo Umia”, no que participan preto de medio cento de persoas e varios colectivos para deixar constancia da oposición á construción da minicentral da Ermida, cuxos traballos están a día de hoxe moi avanzados e teñen provocado xa un impacto medioambiental irreparábel.

16.11.07 – Preséntase en Compostela a rede nacional Galiza Non Se Vende, cuxo obxectivo é a conservación da nosa paisaxe e medio natural. O Fervedoiro fai parte dela dende xa, dende o seu nacemento coma tal (o seu xermolo é a Rede Litoral Vivo). Integrámonos activamente participando no mantemento da páxina achegando as novidades dos asuntos medioambientais da nosa comarca nos que estamos implicados.

26.11.07 – Denunciamos a rotura dunha estela fálica da época romana que xacía no chan na Vila do Baño. Ao tempo, reiteramos que a conservación do noso patrimonio histórico segue a ser precaria en Cuntis, e este feito é boa proba delo. A parte rachada levámola nós mesmos á Casa da Cultura Roberto Blanco Torres atendendo á petición dos responsábeis municipais.

30.11.07 – Rexistramos no Concello de Cuntis un documento no que solicitamos a toma en consideración de diversa información que recollemos e achegamos sobre os prexuízos da contaminación electromagnética e a instalación de redes inarámicas. Isto ten relación co anuncio da instalación deste tipo de tecnoloxía (wifi e wimax) a comezos do vindeiro ano para espallar a internet sen fíos en diversos puntos do rural cuntiense.

18.12.07 – Denunciamos unha nova agresión ao medio. Trátase desta vez dun vertido de neumáticos nun monte próximo ao Río Umia, na zona da Taboada.

22.12.07 – Organizamos en Cuntis a presentación do DVD de SS.GG. “1996-2006: Dez anos luitando por Galiza”. Contamos coa presenza dun deportista galego dos de máis alto nivel, Ezequiel Mosquera, e vén a ser este acto unha previa á viaxe organizada aos encontros das Seleccións Galegas de Fútbol da vindeira semana en Vigo.

27.12.07 – Como xa ocorrera o ano pasado, organizamos a viaxe ao partido Selección Galega. A novidade deste ano foi a estrea da feminina fronte a Catalunya, que xogou antes do Galiza-Camerún masculino. 120 persoas mobilizadas dende toda a comarca, oitenta delas en dous autobuses que saíron de Cuntis son os rexistros de 2007 nunha nova mostra de compromiso coa Selección Galega e o recoñecemento da súa oficialidade.

04.01.08 – Organizamos a presentación en Cuntis (Casa da Cultura “Roberto Blanco Torres”) da obra de Xosé Luna “No pazo de Laiovento. Conversas con Francisco Pillado Maior“. Rexístrase unha notábel afluencia de público entre o que se poderían citar salientábeis persoeiros da cultura galega, que xunto aos integrantes da mesa (o citado Xosé Luna como autor, Francisco Pillado como protagonista e M. A. Fernán Vello como editor) fixeron do acto un fermoso inicio da rolda de presentacións por todo o país desta obra.

20.01.08 – Organizamos, en colaboración coa A. C. O Arco de Merza, a representación da peza “Parodia futurista: ollada a un futuro posíbel” a cargo do grupo Churumbel Teatro, vido tamén desas terras.

30.01.08 – Presentamos a Campaña de Normalización Lingüística en Cuntis ’08, rexistrándoa no Concello e difundíndoa. Ao tempo, comezamos a procurar apoios de entidades e colectivos comprometidos en tarefas de normalización lingüística. A campaña consta dunha serie de medidas a pór en marcha, centrándose especialmente na toponimia pero sen esquecer outras medidas, como a creación dunha praza de Normalizador/a lingüístico/a ben sexa a nivel local ou comarcal.

09-02-08 – Conferencia “O colonialismo interior”, de Xosé Manuel Beiras. Celébrase na Casa da Cultura “Roberto Blanco Torres” e colleita unha exitosa asistencia de público. O peche musical é carga de Roi Casal, integrante do grupo Milladoiro.

15-02-08 – Colaboramos na distribución do novo traballo do grupo vigués Skárnio. “O nosso caminho” é o título deste terceiro disco que está editado baixo licenza copileft e se pode atopar en todos os centros sociais de Galiza.

17-02-08 – Asistimos á manifestación nacional de Galiza Non Se Vende. Como integrantes da rede e colectivo convocante, facemos visíbel na mobilización de Compostela a construción da minicentral da Ermida, que suporá un novo golpe ao xa maltreito Umia.

29-02-08- Asistimos o Ferrol xunto cos compañeiros e compañeiras de Siareir@s Galeg@s para estar a carón da nosa selección nacional de fútbol sala na sua estrea fronte o Uruguai. Somos partícipes da xornada de festa e reivindicación programada por Siareir@S Galeg@s, formando parte da mobilización nacional en prol da oficialidade e asistindo a festa-concerto na Fundación Artabria.

07-03-08- Recollemos o premio que acadamos no concurso de fotografía en prol da Igualdade de Xénero promovido polo Concello de Cuntis nun acto celebrado no CPI Don Aurelio de Cuntis.

07-03-08- Organizamos xunto coas asociacións Ken Keirades da Estrada, Coto Manguelo de Orazo e A Fervenza de Ouzande o acto reivindicativo-simbólico “Estamos Todas” en prol dos dereitos da muller. Por motivos alleos aos convocantes do acto debemos facelo unha data antes do propio día sinalado no calendario oficial.

17-03-08-Denunciamos un novo atentado contra o noso (o de todas/-os) patrimonio arquitectónico, desta volta tocoulle a igrexa de Couselo ser obxecto dunha nova CHAPUZA nesta terra de arghinas. Un ghalpón, o tapiado dunha ventá e unha escaleira e varandas metálicas son as novas inquilinas do lateral e tellado, repectivamente, da parroquial de Couselo.

24-03-08- Convocamos o concurso Na Nosa Lingua para os rapaces e rapazas de 1º e 2º da ESO do CPI Don Aurelio, co obxecto de potenciar o uso da lingua galega entre os máis novos. Colabora con nós o equipo de normalización ligüístico do debandito colexio.

27-03-08- Denunciamos publicamente os últimos verquidos atopados en diferentes ríos do noso concello, mais concretamente na zona da Bagada e no entorno do encoro da Baxe, atopados nunha inspección realizada por varios membros do noso colectivo. Nos vindeiros días procederemos a facer a denuncia pola vía administrativa.

30-03-08- Denunciamos a aparición dun can asasinado e con claros síntomas de maltrato ao lado da pasarela do río Gallo onde se ergue a nosa pancarta: “NON MATEMOS AS NOSAS AUGAS”. Procedemos a denuncialo perante os medios de comunicación, o 062 e a Guardia Civil para que se comecen as pescudas que logren dar co autor/-a ou autores desta atrocidade.

01-04-08- Rexistramos no Concello da Estrada a denuncia dos vertidos localizados por membros do noso colectivo na contorna do río Vea, ao seu paso pola zona da Bragada.

09-04-08- Rematamos o traballo de traducción levado acabo en colaboración co Xulgado de Paz de Cuntis. Consistiu na galeguización de varios documentos que son utilizados no día a día do traballo nos xulgados de paz.

11-04-08- Remitimos á Delegación Provincial de Pontevedra da Consellería de Innovación e Industria e ao Subdirector de Espazos Naturais e Biodiversidade da Consellería de Medio Ambiente e Desenvolvemento Sostíbel senllas alegacións en relación á pretensión de crear un parque eólico (Touriñán III) que afectaría aos Concellos de Cuntis, A Estrada e Campolameiro.

14-04-08- Completamos alegacións á pretensión de crear o parque eólico Touriñán III, versa sobre diversos aspectos do patrimonio histórico-artístico cuntiense e da contorna.

27-04-08- Organizamos a presentación do libro do noso compañeiro Héitor Picallo: “Xohán Xesús González: un precursor do soberanismo galego”, na mesa ademáis do citado autor estiveron Francisco Pillado (edicións Laiovento) e o mestre e escritor Carlos Loureiro. A primeira presentación en público desta obra, que recupera a figura do noso veciño, estivo arroupada por un gran número de persoas.

05-05-08– Presentamos á Consellaría de Industria e Innovación un documento, rexistrado a través do portelo único do Concello de Cuntis, no que pedimos explicacións sobre o estado actual da burga “Lume de Deus”, situada na Praza de Galiza (Cuntis) tralos últimos acontecementos ocorridos.

13-05-08- Solicitamos ao Concello de Cuntis, por medio de escrito presentado no rexistro municipal e dirixido ao pleno, solucións aos continuos verquidos localizados en dous puntos do río Gallo o seu paso pola vila do Baño e aos problemas resultantes das obras de “rexenaración” que se levaron a cabo no devandito río.

16-05-08- Asistimos, coma parte integrante de Siareir@s Galeg@s, ao I Torneo das Nacións celebrado no pavillón de Santa Isabel en Compostela. Na primeira xornada a selección galega vence a Euskadi clasificándose para a final.

17-05-08- Estamos presentes na final entre Galiza e Catalunya que vencen as catalanas, dende a nosa bancada as reivindicacións e apoio para con as nosas seleccións non faltaron durante a fin de semana. Tamén asistimos a homenaxe de David Otero, un noso padriño, na Estrada.

20-05-08- Rexistramos alegacíon dentro do prazo de exposición pública da ocupación dos terreos onde se pretende fincar un aeroxenerador (A1) no Monte Caeiro, pertencente ao parque eólico Arca Fase 1, expoñendo as distintas razóns polas que o noso colectivo amosa o seu rechazo.

11-06-08- Facemos denuncia pública do enésimo verquido ao Gallo e da localización por parte de membros do noso colectivo de canalizacións ocultas ao longo do mesmo.

14-06-08- Estamos presentes nas I Xornadas lúdico-deportivas organizadas por Siareir@s Galeg@s e o centro social A Esmorga na cidade de Ourense durante toda a fin de semana.

20-06-08- Entregamos o premio do concurso Na Nosa Lingua convocado polo noso colectivo para os alumnos e alumnas do CPI don Aurelio.

31-07-08- O pleno municipal de Cuntis aproba a instalación do aeroxerador no monte Caeiro (Arcos de Furco) rexeitando así a alegación presentada polo noso colectivo na que rexeitabamos o avance do “negocio eólico”.

13-08-08- Celebramos na casa da cultura Roberto Blanco Torres a charla coloquio “A canción como protesta”, Paulo Tobio, Davide Senén Otero e Vicente Araguas son os nosos convidados. Este acto serve como presentación do Festidoiro 2008.

14-08-08- Voltamos denunciar un novo verquido ao Gallo que desta volta leva consigo a morte de máis dun cento de troitas.

22-08-08- ten lugar na Feira (O Baño) o Festiodoiro 2008 que resulta ter unha gran acollida de público que acudeu dende diversos puntos da xeografía do noso país para escoitar e compartir a música dos John Deers, Motor Perkins, Nao e Skarnio.

4-10-08– realizamos a limpeza do rio Gallo ao seu paso polo Baño, retirando do cauce todos aqueles residuos sólidos urbanos. A iniciativa está impulsada dende o “Proxecto Ríos” da asociaicón Adega, e faise simultanemente en varios ríos do país.
 

23-10-08- Presentamos na libraría Couceiro de Compostela o libro “A Epopea do Terzo de Galegos: orixes, crónicas e protagonistas. Compilación de Investigación”, obra do historiador Horacio Guillermo Vázquez Rivarola.

27-12-08- Como parte integrante de Siareir@s Galeg@s mobilizamos dende a nosa comarca a preto de cento trinta persoas para participar na xornada de festa e reivindicación que o colectivo nacional que loita pola oficialidade das nosas seleccións argallou para o día en que a selección nacional de fútbol masculina se enfronta a Irán no estadio de Riazor.

28-12-08- estamos presentes no partido da selección nacional feminina de fútbol que se enfronta as Illes Balears no estadio de Pasarón (Pontevedra), onde volta a estar presente a reivindicación de OFICIALIDADE.

18-01-09- amosamos a nosa solidariedade co pobo palestino xunto a milleiros de persoas que ateigan a Quintana reivindicando un compromiso firme do estado español condenando a masacre e rachando relacións co estado sinoista.

15-02-09- ao igual que o pasado ano asistimos á manifestación nacional que convoca a rede Galiza Non Se Vende da cal formamos parte. Nas rúas de Compostela están presentes as nosas denuncias do que por estas terras do Umia e do Gallo acontece: “Ríos que son Camposantos – Encoros Non”; augas termais que son exclusivamente privadas; e novos aires que han mudar aínda máis as nosas paisaxes: “O V€NTO DO CAPITAL: TOURIÑÁN III, QUIN… TAÑÁN V”.

25-04-09- organizamos un roteiro reivindicativo polo monte de Arcos ao que acuden compañeiros/as da Agrupaçom de Montanha Augas Limpas e da Asociación Xurásica do barrio do Castiñeiriño (Compostela). Con esta ruta queremos por en valor o patrimonio natural da contorna e reivindicar que a terra segue a ser nosa e non do capital especulador.

17-05-09- participamos na multitudinaria e històrica manifestaciòn pola defensa da LÌNGUA, que se celebra en Compostela, amosando que Galiza non deixarà endexamais de loitar pola conservaciòn da sùa voz. Baixo o lema “500 anos arrincàndonos a lìngua!” o noso colectivo percorre as rùas da capital galega.

13-06-09- é o día escollido para lle render homenaxe a Xohán Xesús González dende o fogar do Fervedoiro. Unha vez máis numerosas persoas acompáñanos nun acto organizado polo noso colectivo que consiste, desta volta, da presentación da exposición que fixemos sobre a vida e obra do noso veciño, posteriormente unha homenaxe ao carón da campa de Xohán Xesús no cemiterio de Cequeril e rematamos cun xantar de confraternidade.

17.07.09– presentamos o libro de David Otero Alexandre Bóveda. Na demanda de restauración. Nas verbas do nosos convidados, tanto do propio autor do libro coma de Xosé Fernández Abella, están moi presentes os “ilexítimos” que nos continuan agredindo dicíndose donos do noso patrimonio nacional.

13.08.09– en rolda de prensa, celebrada na biblioteca municipal “Roberto Blanco Torres” da vila d´O Baño, presentamos o Festidoiro 09´. Facemos lectura dun comunicado que ven encabezado polo subtítulo desta nova edición: “Língua proletaria do meu pobo…eu canto porque sí!!!”.

22.08.09- celebramos o Festidoiro 09´ que este ano contou coa música de: Vichelocrego, Machina, Skacha, Kogito e Spooner Street. Unha outra vez resulta ser un acto de reivindicación da nosa Língua e Terra Nai.

26.09.09- realizamos por segundo ano consecutivo a limpeza do río Gallo, actividade que se enmarca dentro do Proxecto Ríos (da Asociación Adega). 15 voluntarios e voluntarias percorren un tramo aproximado de medio quilómetro substraendo do leito do río preto de media tonelada de lixo.

08.10.09– a exposición Xohán Xesús González: Porta dun futuro proletario, que realizou o noso colectivo, fai a súa primeira escala no itinerario que fará que percorra o pais para dar a coñecer a figura do canteiro de Sebil. A Gentalha do Pichel convértese así no primeiro Local Social da Galiza que presenta a mostra, onde vai ser acollida durante quince días.

07.11.09- Calo, da man da asociación A Oliveira de Teo, acolle a mostra que realizou o noso colectivo sobre Xohán Xesús Gonzalez. A poeta Elvira Riveiro que forma parte da mesa de presentación volve reivindicar un Día das Letras Galegas para o de Sebil. O coloquio que pon remate ao acto amósanos, ao igual que na presentación que tivo lugar na Gentalha do Pichel, unha nova lección desa História que nos agochan e que temos DEREITO a coñecer!

26.12.09– participamos nunha nova xornada organizada por SS.GG., dende a nosa comarca volve haber unha boa resposta para seguir fortalecendo a proclama dunhas seleccións oficiais galegas. A xornada que ten lugar en Compostela resulta ser un éxito total grazas ao apoio de milleir@s de siareir@s vidos dende os diversos puntos da Galiza e que estiveron presentes nas rúas, bancadas e concertos.

22.01.10- a exposición sobre Xohán Xesús que realizou o noso colectivo fai parada en Ordes da man da Asociaçom Foucelhas. A palestra de presentación volta ser un foro de debate polas causas que no seu día tanto loitou Xohán Xesús e hoxe en día seguen de actualidade; o seu pensamento, a loita a prol dos dereitos d@s traballadores/-as, a férrea defensa da nosa língua…

12.03.10-o noso particular Tren da Memoria que está a levar a exposición que o noso colectivo realizou sobre Xohán Xesús González fai parada nos apeadoiros das Terras de Tabeirós-Terra de Montes, e máis concretamente na cerna urbana da Estrada, no Centro Social Setestrelo. Alí é inaugurada por interese da asociación cultural Ken Keirades, e permanecerá durante todo o mes.

13.03.10- recollemos en Vilagarcía da man do Diario de Arousa o galardón Arousáns do Ano 2010. Concedido por mor do noso traballo a prol da recuperación dos marxes do Gallo e, por extensión, todo o que afecta á conservación do medio ambiente, desenvolvendo unha continua campaña de concienciación social, de denuncia e de actividades “simbólicas” en colaboración con outros colectivos.

29.03.10– En colaboración co Equipo de Normalización Lingüística do C.P.I. Don Aurelio Marcelino Rey e de Edicións Fervenza, convocamos o II Concurso Na Nosa Lingua que ten por obxecto principal potenciar o uso do idioma galego entre os máis mozos e colaborar, así mesmo, no proceso de normalización lingüística do noso país”.

24.04.10- da man do C.S. Revolta a mostra sobre Xohán Xesús trasládase a Vigo. Alí fica até o 8 de maio.

10.05.10–  retorna de novo as terras de Cuntis a mostra do canteiro de Sebil, máis concretamente ao CPI Don Aurelio.

29.05.10- participamos nas “I xornadas de cultura e mocidade” organizadas por Galiza Nova na Estrada. Xunto con outros colectivos  (Verbo Xido, Fervenza de Ouzande, As nosas músicas de Couso, C.S. Setestrelo ou Os Penancos de Valga) amosamos o traballo realizado e partillamos sobre as prespectivas de futuro.

09.06.10- entregamos os premios do concurso Na Nosa Língua que convocamos un ano máis no C.P.I don Aurelio de Cuntis. Ademáis da colaboración do Equipo de Normalización Lingüística do devandito colexio contamos tamén coa aportación dos grupos musicais Machina, Nao, Kastomä e Skarnio que nos enviaron varios dos seus traballos para entregarlles as/os estudantes premiados/as.

27.08.10- un novo Festidoiro ve a luz no campo d´A Feira da vila do Baño. Os Tres Trebóns, Medomedá, Kastomä, Raiba e o Leo i arremecaghona ofrécennos a sua música para o disfrute dunha longa noite de festa e compromiso coa Língua deste país.

20.10.10- unha xornada arredor do Umia ten lugar de novo no fogar do Fervedoiro. As condicións climatolóxicas non permiten desta volta realizar a limpeza nun dos tramos elxidos do rio Gallo, porén o foro da tarde ten lugar nunha ateigada biblioteca municipal “Roberto Blanco Torres” e saca a relucir os diferentes traballos e críticas dos colectivos e persoas presentes na mesa de faladoiro e tamén antre o público.

03.04.11- organizamos xunto coas asociacións O Arrieiro de Moraña e Xesús González Aboi de Caldas de Reis un roterio de denuncia na freguesía de Troáns (Cuntis). Pretendendo chamar a atención sobre a falta de control por parte das administracións (local e autonómica) na protección e conservación do Medio Ambiente ante as obras da parcelaria que se están a levar adiante nesas terras.

15.04.11- presentamos no C.S. A Revira (Pontevedra) a exposición de Xohán Xesús González. Alí permanecerá durante 15 días.

16.04.11- realizamos a subida ao Xesteiras, programada dentro dunha serie de saidas a pé que levaremos a cabo nas vindeiras datas. No cumio do monte despregamos unha faixa coa lenda “PAREMOS O EXPOLIO AMBIENTAL“,  un S.O.S en defensa do monte galego.

30.04.11- facemos o segundo dos roteiros proxectados dende o noso colectivo baixo o nome “Vén de Roteiros”. Desta volta percorremos a Circular de Cuntis que en plena sintonía coa auga dos rios Umia e Gallo lévanos por aldeas coma Mesego, Arca, Vilar de Mato, Cequeril, Fontecova ou Rogadío.

28.05.11- organizamos o I Aberto de Billarda en Cuntis coa axuda da Liga Nacional de Billarda (LNB). A xornada conta cun amplo programa de actos. Comeza ás 12 h. cun encontro amigábel no campo d´A Ran entre SS.GG. Umia-Tabeirós e un combinado de asociacións, xantar de confraternidade e Aberto de Billarda na Área dos Albariños e remata cun concerto na taberna O´Chiorta coas bandas; Morula, os John Deeres, Locust and Orchids e Comando Robalisa. Alta participación e bo ambiente rodeadan o día.

10.06.11– celebramos na Praza das Árbores (O Baño) a Rúa de Cuntis, que pretende recuperar as antigas foliadas que tiñan lugar en moitos lugares da Galiza. Xentes dos máis diversos lugares do país acompáñannos nunha noite chea de baile, música e tradición.

26.08.11- o Festidoiro 2011 ten lugar na Feira do Baño. Nesta cuarta edición do noso festival acompáñanos a música de Deseqilibrio Mental, Fracasados de Antemano, Skarmento e Keltoi. Máis unha vez “Na Língua Nai”  mantense deste xeito viva a nosa idea de achegar a música do noso país feita no idioma da nosa terra e que sigue tendo tan boa acollida.

01.10.11- realizamos a Limpeza do Gallo, encadrada dentro do Proxecto Ríos da asociación ecoloxista Adega. Desta volta ao redor de 400 kilos de lixo foron sacados do río nunha mañá na que colaboraron unha vintena de voluntari@s .

03.12.11– levamos a cabo o Roteiro da Memoria xunto coas asociacións  O Meigallo (Cuntis), Portavezal (Cuntis), Xesús González Aboi (Caldas de Reis), A Cabana (Moraña) e Vagalumes (A Estrada). Trátase dun percorrido ao carón do Gallo que parte dende a praza das Árbores da vila do Baño, pasando por Meira e Fontecova para rematar na Ponte Taboada, lugar este último simbólico por ser a “gran cuneta de Cuntis” nos tempos da barbárie fascista.

04.02.12- acollemos a premier do documental “Resistencia ao Encoro do Umia. A razón como defensa“. A reportaxe moi completa e tremendamente documentada, de Santi Martinez e César Caramés, quere ser unha homenaxe a todas aquelas persoas que dende o primeiro momento loitaron para que non se erguese a mole de formigón.

24.03.12– continuamos coa programación que demos en comezar o pasado febreiro. Desta volta “O Espírito das Trincadeiras” de Seném Outeiro é o documental que temos ocasión de ver. Ao finalizar a súa visualización intervén Xosé Alfredo Pereira, Presidente de ORGAMMCC, que fai un repaso pola historia do monte comunal galego e ábrese un turno de intervencións para pechar cun coloquio entre os/as presentes.

21.04.12- presentamos o poemario de Xoán Xosé Fernández Abella “Poemas de amor, loanza, condena e outros“. O autor estivo acompañado do escritor estradense David Otero e do cantautor cuntiense Manoele de Felisa que nos fixeron gozar dun emocionante acto ao redor da poesía.

10.05.12– organizamos a exposición que leva por nome “Un paseo pola Literatura Galega: dende as páxinas dos libros vellos” no CPI cuntiense Don Aurelio Marcelino Rey, co gallo do mes das Letras Galegas.

08.06.12- celebramos a II Rúa de Cuntis, por mor do mal tempo non puidemos repetir na Praza das Árbores da vila do Baño como así foi na súa primeira edición. Na Tenda da Ponte houbo música e baile tradicional ata altas horas. Acompañad@s por xentes que se achegaron dende diversos lugares do país.

16.06.12- participamos por vez primeira nas Olimpiadas Populares Galegas, celebradas desta volta en Ponte Vea (Teo). Ademáis dos éxitos deportivos acadados destacamos por riba de calquer outra cousa a gran experienciencia resultante dunha finde de semana de convívio con outros axentes sociais do noso País.

23.06.12- baixamos ao río con Adega para elaborar a identificación e clasificación da fauna e flora do Gallo, tamén nos serve para ter un control da calidade da auga.

15.09.12- dende a autoxestión facemos fronte ao desgoberno no noso concello. Armados de desbrozadoras, angazos e elementos varios decidimos recuper así coas nosas propias mans a Área recreativa dos Albariños que levaba máis dun ano en estado de completo abandono.

22.09.12- ten lugar nos Albariños o II Aberto de Billarda de Cuntis arropuados, desta volta, por máis dun cento de persoas. Ademáis do campionato de estornela o programa de actos complétase cun partido amigábel de fútbol sala entre asociacións de comarca, xantar popular, xogos tradicionais e foliada.  Este evento vai asentándose como cita ineludíbel para os amantes deste xogo e meténdolle a paixón a cada ves máis xente.

30.09.12– dentro da V Limpeza de rios impulsada dende Proxecto Rios, de ADEGA, baixamos máis unha vez ao Gallo para retirar do seu cauce o lixo que non deixa de acumular ano tras ano. Desta volta retiramos ao redor de 250 kilos.

06.11.12- presentamos escrito no Concello de Cuntis solicitando que a veciñanza poida de novo facer uso do manancial da Burga do Castro e servirse do camiño que vai até el como dende antano se viña  facendo. Por mor dunhas obras que levou a cabo a empresa propietaria do parque, onde se atopa situada a burga, o paso ata ela quedou restrinxida.

20.11.12- facemos público o Proxecto “Arredor da Auga”, en colaboración con ADEGA procuraremos pór en valor o patrimonio etnográfico e cultural do noso río. A recuperación dos Pasos de Meira e a dun Lavadoiro fluvial son duas das actuacións que se enmarcan dentro dos nosos obxetivos.

22.12.12- organizamos coa colaboración da Asociación O Meigallo de Cuntis o II Roteiro da Memoria. Desta volta transcorre polo casco urbano da vila do Baño recordando así a historia das víctimas e represaliados/-as do fascismo que foron parte da vida do pobo. Para pór o peche do acto todas elas son recordadas ademáis das da bisbarra do Umia lendo os seus nomes en voz alta ao son do himno galego. Contamos coas actuacións musicais do cantautor cuntiense Manoele de Felisa e do marinense David Iglesias coa zanfoña.

 14.02.13- acordamos presentar alegacións un novo proxecto eólico que desta volta queren asentar no Xesteiras. Un negocio que esmaga o noso medio para beneficio duns poucos e do que a veciñanza non saca nengún proveito. Facemos denuncia pública e xunto cos compañeiros de Naturgalicia poñémonos mans a obra para a preparación das alegacións.

09.03.13- dentro do proxecto “Arredor da Auga” englóbase esta nova activida que consiste na limpeza dos lavadoiros fluviais do Gallo. Unha ducía de voluntarias e voluntarios e coa colaboración de ADEGA damos un pasiño máis neste traballo que pretende pór en valor o patrimonio etnográfico do noso río e concienciar a cidadanía.

18.0.13- colaboramos coa asocación O Meigallo e o CPI don Aurelio de Cuntis no acto “Lembrando a Roberto Blanco Torres no seu 122 aniversario” no que se afonda na vida e obra do escritor cuntiense fusilado no 36′

22.03.13- o día internacional da auga rexistramos no portelo único do concello de Cuntis alegación ao proxecto eólico do monte Xesteiras.

22.03.13- esiximos unha vez máis o alcalde de Cuntis información sobre o peche da Burga do Castro, que priva ao pobo da auga termal e da servidume de paso.

17.04.13- convocamos en colaboración co equipo de normalización lingüística do CPI don Aurelio Marcelino Rey o I Concurso Poético en Galego que ten por obxecto principal: pontenciar o uso do idioma galego entre os máis mozos e colaborar, así mesmo, no proceso de normalización lingüística do noso país”.

17.04.13- completamos a nosa alegación ao proxecto do parque eólico Touriñán III que afecta aos concellos de Cuntis, Campo Lameiro e A Estrada e que xa presentéramos o 11 de abril de 2008 tendo constancia de que o proxecto se atopa na última fase administrativa.

28.05.13- facemos denuncia pública do total abandono da EDAR de Meira por parte do goberno local e as súas administracións amigas.

30.05.13- celebramos a entrega de premios do I Concurso Poético en Galego celebrado no colexio cuntiense. por mor da cantidad e calidade das composicións poéticas resólvese conceder cinco accésits amáis dos premios anunciados por curso.

31.05.13- solicitamos o pleno municipal información sobre unhas obras que se estiveron a realizar na rúa que une a praza do Ferrol ca finca do Castro.

15.06.13- temos ocasión de presentar públicamente o roteiro “Arredor da Auga” no IX Encontro do Voluntariado Proxecto Ríos que se ten lugar no centro de interpretación da Casa das Ínsuas do concello de Rábade.

16.06.13- denunciamos ao Seprona varios focos de vertido que emanban un forte fedor  a sumidoiro na zona da ponte que as rúas Bernardo Sagasta e Convento coa Pza de Galiza.

17.06.13- facemos pública a grabación dunhas imaxes desta mesma tarde na EDAR de Meira, esixindo unha vez máis  solucións a este Atentado Ecolóxico

28.06.13- volve acontecer o mesmo que o pasado día 16, e a garda civil preséntase no lugar dos feitos.

03.07.13- inciamos unha campaña de recollida de sinaturas na rede que leva por nome Acción Recuperatoria das Burgas co obxeto de facer forza ante as perdas patrimonio e dereitos que estamos padecendo con respecto as augas termais.

13.07.13- realizamos unha nova acción conxunta Arredor da Auga limpando os dous lavadoiros fluviais que nos quedaran pendentes na nosa primeira actuación.

30.07.13- trasladamos, conxuntamente a varios membros da recén creada Plataforma Veciñal pola recupareción dos bens públicos vinculados as augas termais, un documento que explica a situación que estamos a padecer no noso concello  á organización EFA-ALE, cuarto grupo político do Parlamento Europeo, con respecto a perda de dereitos e patrimonio termais.

29.07.13- alertamos do vertido dunha arqueta que se atopa na propiedade de Termas de Cuntis que está afectando ao paseo fluvial e está a piques de chegar o río.

5.10.13- sobre o verde dos Albariños ten lugar o III Aberto de Billarda de Cuntis. A República billardeira de Guimarei acolle un novo e apaixoante campionato do varal que xa se asenta como Aberto referencial para os amantes do varal da nosa comarca.

14.10.13- colaboramos na distribución do primeiro traballo de Liska, banda de ska vigués na que leva a voz levo o selo dun chapante emigrado a cidade dos guindastres de nome Paulo Tobío.

02.12.13- comeza a exposición, realizada pola Agrupación Cantigas e Agarimos, que conmemora o 51 aniversario da en Galiza da obra “Os vellos non deben namorarse” de Castelo. A mostra estará até o 20 do presente mes no CPI don Aurelio.

04.12.13- da man de Quinteiro do Umia facemos público o trailer do III Roteiro da Memoria co fin de darlle a maior cobertura posíbel na rede a promoción deste evento.

14.12.13- pola mañá realizamos pola freguesía de Arcos de Furcos o III Roteiro da Memoria. Recordamos especialmente o alcalde Manuel Rodríguez e o concelleiro Serxio González naturais destas terras e asasinados polos falanxistas en 1936. Tamén lembramos a casa e orixes dos Liste, raiceira do egreixo Enrique Lister. Rematamos o roteiro escoitando o himno galego da man do zanfoñista de Marín Davide Iglesias Portela e facendo lectura do nome da cada unha das persoas represaliadas e vítimas do 36´da nosa comarca. Xa na tarde visionamos na biblioteca municipal Roberto Blanco Torres da vila do Baño o filme biográfico de Alexandre Bóveda “A Fazaña da Liberdade” do director estradense Seném Outeiro.

18.12.13- voltamos percorrer as prazas e rúas da vila cuntiense nun especial Roteiro da Memoria para o alumnado de 4º da ESO do colexio público do Baño.

20.12.13– ponse fin no colexio don Aurelio a estancia da mostra que conmemora o 51 aniversario do estreo en Galiza da obra “Os non deben namorarse” de Castelao. Poñendo así o peche a este especial Mes da Memoria que organizamos dende o noso colectivo coa colaboración de diversas entidades: CPI don Aurelio, Agrupación Cantigas e Agarimos, Asociación O Meigallo, Filmika Galaica e Quinteiro do Umia.

14.01.14- instalamos no CPI don Aurelio de Cuntis unha exposición de minerais, rochas e fósiles. O obxectivo é dar a coñecer o mundo xeolóxico e paleontolóxico ao alumnado para que sirva como complemento das materias de ciencias.

24.01.14- participamos no encontro organizado por Adega no MOME de A Estrada no que foron presentados os resultados da “Custodia Fluvial Ulla, Umia e Lérez”. Dende a nosa parte amosamos os traballos realizados ate día de hoxe dentro do noso proxecto “Arredor da Agua”.

25.01.14- presentamos o novo libro do noso compañeiro Héitor Picallo que leva por título “Coa Língua Na Terra”. A casa da Cultura do Baño queda pequena para acoller esta presentación, non faltan os poemas de Fernández Abella nen a música e voz de Manoele de Felisa. Na mesa de presentación o autor da criatura está acompañado das xornalistas Chus Gómez (Diario de Pontevedra) e Mercedes Angueira (Diario de Arousa).

11.02.14. temos coñecemento que o Concello de Cuntis desoíu un requerimento da Administración Hidráulica en materia de vertido de augas residuais. Por mor do mal funcionamento das EDAR de Meira e Arcos de Furcos. Denunciamos a INCOMPETENCIA do goberno local que no que vai de lexislatura desatendeu as nosas denuncias nesta materia e agora tamén fai caso omiso o expediente de Augas de Galicia.

19.03.14. recollemos nun vídeo o estado no que se atopa o Gallo e os seus marxes despois do duro inverno que estamos a vivir. Árbores caidas sobre o río e paseos esnaquizados forman parte do novo panorama. As administracións compententes nin se pronunciaron sobre o asunto.

24.04.14. dende a nosa sección ACUDE ALÍ  vimos de convocar o II Certame Poético, que este ano leva por nome CARMEN DE XINZAL. Vai dirixido ao alumnado de secundaria do CPI don Aurelio de Cuntis co obxecto de normalizar o uso do galego, estimular a creación poética entre as/os mozas/os de Cuntis e defender os Dereitos Humanos. A mediados de maio darase a coñecer o fallo do xurado.

13.05.14. facemos entrega dos premios do II Certame Poético Carme de Xinzal; 3º premio Abraham Argibay González, alumno de 2º da ESO. 2º premio Laura Lobato, alumna de 3º da ESO. E 1º premio  Regina Touceda Rey, alumna de 3º da ESO.

20.05.14- achegámoslle ao alumnado de 3º da ESO do colexio cuntiense os traballos de recuperación e posta en valor que estamos a levar a cabo dende o noso proxecto “Arredor da Auga”.

01.07.14- localizamos un vertido debaixo da ponte de pedra do río Gallo que comunica as rúas Bernardo Sagasta e Convento coa praza de Galicia, detrás do hotel La Virgen. De seguido avisamos a emerxencias e ao concelleiro de obras. Os traballadores municipais desatoan varias arquetas, todas nas inmediacións do vertido; unha das cales, curiosamente, atópase situada no interior do recinto do balneario; porén descoñecemos se esta arqueta é municipal ou privada.

18.07.14- Varios foron os membros deste colectivo que efectuando labores de control nas beiras do río Gallo puideron ver como moreas e moreas de cascallos de obra e asfalto se comezaron a amorear, estes días, na contorna da Estación Depuradora de Augas Residuais de Meira. Curioso tamén é comprobar como xa foi aberta, por medio de maquinaria pesada, unha gabia ou gran foxo. Denunciamos que varios dos “Pasos de Meira” atópanse dentro da superficie delimitada polas obras aínda que non se poden visualizar polos lodos.

21.07.14- acordamos unha xuntanza con membros da empresa adxudicataria das obras da EDAR, responsábeis da obra comprometéronse a desenterrar manualmente os lodos que ocultan estas pezas graníticas empregadas polas/os cuntienses, cando menos, dende o século XVIII.

28.07.14- 528 días despois da nosa denuncia pública sobre o estado ruinoso do tramo de paseo fluvial que vai dende a Ponte até as piscinas municipais voltamos esixirlle a administración local que actúe, dunha vez por todas, segundo as responsabilidades que lle son propias.

11.09.14- Quinteiro do Umia publica un expectacular spot promocional para o IV Aberto de Billarda que un ano máis organizaremos coa colaboración deste proxecto comunicativo da nosa comarca e da Liga Nacional de Billarda (LNB).

23.09.14– celebramos o IV Aberto de Billarda  no xa mítico teatro dos soños billardeiros da aldea de Guimarei.

04.10.14- realizamos unha nova limpeza no río Gallo, actividade que se encadra dentro da VII Limpeza Simultánea de Ríos que coordina Proxecto Ríos.

 

 

 

 

 



Comments are closed

»  Substance:WordPress   »  Style:Ahren Ahimsa